बालअधिकारको संरक्षण र सम्वद्र्धनका लागि क्रियाशील नेपालको अग्रणी सामाजिक संस्था सिविन–नेपाल, देशकै पहिलो बालअधिकारमुखी संस्थाका रूपमा सुपरिचित छ । बालबालिकाका सन्दर्भमा नवीन सोच र चिन्तनकासाथ लोकतान्त्रिक आन्दोलनमा क्रियाशील विद्यार्थीहरूद्वारा सन् १९८७ मा स्थापित यस संस्थाले नेपालमा बालअधिकार आन्दोलनको बिजारोपण गर्नुका साथै निरन्तर नेतृत्वदायी भूमिका निर्वाह गरिआएको छ ।
सिविनको निरन्तर इमान्दार प्रयासबाट कुनै चर्चाको विषय नरहेको बालअधिकारको विषयलाई आमसरोकारको राष्ट्रिय मुद्दाका रूपमा रूपान्तरण गर्न महत्वपूर्ण योगदान पुगेको छ । पछिल्लो चार दशकमा नेपाली बालबालिकाको पक्षमा थुप्रै असल अभ्यासहरुको थालनी र सकारात्मक परिवर्तनहरु भएका छन् । राष्ट्रिय नीति तथा कानुनहरू अन्तरगत राज्यका विभिन्न तहहरूमा बालसंरक्षणका लागि संरचनाहरू निर्माण भएका छन् र बालअधिकारको मुद्दाले नेपालको सामाजिक विकासको परिप्रेक्षमा महत्वपूर्ण स्थान लिएको छ । यसैगरी बालबालिकाको सहभागिताले पनि महत्व पाउंदै गएको छ । नेपालको संविधान (२०७२) ले बालअधिकारलाई बालबालिकाको मौलिक हकका रुपमा स्थापित गरेको छ ।
यसरी पछिल्लो चार दशकमा बालअधिकारको क्षेत्रमा उल्लेखनीय रूपमा नीतिगत तथा व्यवहारिक उपलब्धिहरू हासिल भएको भएता पनि देशका हरेक बालबालिकाको आधारभूत बालअधिकार सुनिश्चित गर्ने सन्दर्भमा अझ पनि थुप्रै चुनौतीहरू विद्यमान रहेका छन् । विद्यमान कानुन तथा नीतिहरुको कार्यान्वयन नहुनु, गुणस्तरीय सार्वजनिक शिक्षा तथा स्वास्थ्यमा पहुँच नहुनु, बाल गरिबी र बालबालिकाको शारीरिक, मानसिक तथा यौन शोषण, लैङ्गिक विभेद, लगायत विभेदकारी सामाजिक व्यवहार जस्ता विकृतिहरू समाजमा अझ पनि कायम् रहनु चुनौतीपूर्ण पक्षहरू हुन् ।